Andriamanitra ve no mandao ? (ANJOMARA-Anosivavaka)

Ity hira ity dia ao anatin’ny K7/CD vol.2 navoakan’ny ANJOMARA-Anosivavaka tamin’ny taona 2001.

ANDRIAMANITRA VE NO MANDAO ?
Feony : Ndratoson Georges Benjamin
Tonony : Ndratoson Georges Benjamin

Andriamanitra ve no mandao ?
Sa ny olona, ho’aho, no efa leo ?
Andriamanitra ve no mandao ?
Ka tsy rototra intsony izy mitady Anao ?

Andriamanitra ve no mandao ?
Sa ny olona, ho’aho, no manao tsy ho tola ?
Andriamanitra ve no mandao ?
Ka tsy mihevitra afa-tsy harena sy vola ?

Andriamanitra tsy mandao ;
Fa ny olona, ho’aho, no manao izay tiany atao.

Fa feno haratsiana ny fiainana an-tany,
Inona, ho’aho, no mahatonga izany ?
Ô Jeso, aza mba hafoinao izahay !
Ô, nahoana ?

Andriamanitra ve no mandao ?
Sa ny olona, ho’aho, no be lalao ?
Andriamanitra ve no mandao ?
Ka tsy fantany intsony izay tokony atao ?

Misy fetra anie ny fotoana
Hivavahana sy hitalahoana,
Mba tsy ho tratry ny ngidin’ny nenina mafy
Tsy laitra ianao !

Andriamanitra tsy mandao ;
Io Izy miandry ahy sy anao.
--------