Vaninandro niarahana (Dadah Rabel)

Misaotra anao nahatsiahy  
Ny vaninandro niarahana
Fa fahasambarana ho ahy
Ireo mamy hifanapahana

Tsaroako toa vao anikeo
Ny lalantsika niray
Niarahana naneho
Ilay fitia ho mandrakizay

Niaraha-nikojakoja
Voatondraka  tsy halazo
Voaaro tamin’ny loza
Tsy nisy sampona nahazo

Fitia feno fifandererana
Feno fifanajana
Raha sendra ady niserana
Na ola-mora nofafana

Fitia tsy mety tonta
Isanandro vaovao
Toy ny masoandro mipoitra
Mitsiky lava tsy mety  hankalao

Fitia tsy mety maty
Tsy resin’ny fahazarana
Ka latsa-paka ao anaty
Satria fitia nisasarana

Etsy ny sandriko hiankino
Handeha hamerina indray
Ireo lasa mamy tsy adino
Fa nampitambatra, nampiray

Ny ho avy mikopa-tanana
Toa miantso hoe :"tongava:
Tsy ho ela intsony ny lalana
Ho mora ny dia
Ho mora satria
Izahay mifankatia tsy hisy haharava
--------