IANAREO ZANAKO (Dadah Rabel)

Namoronako ny tsy nanànako,
Nanakarako ny tsy azon’ny tànako,
Nandaniako izay kely fananako,
Ianareo zanako...

Ts’isy tany nihoriranako,
Matetika aza tsy nihinanako,
Aretina aza mbola nitsanganako,
Noho ianareo zanako...

Satria, tsy misy maniry,
Ireo voa nafafiny no ratsy faniry;
Samy mikolo sy mikely aina,
Mba ny soa no hojinjaina,
Hanana ny tsara hoandrandraina.

Be ny làlana azo nandehanako,
Ny sampanana azo niolanako,
Saingy ny mahitsy no notanako,
Noho ianareo zanako...

Matetika, nikapoka ny tànako,
Nisy fotoana tsy maintsy nihenjanako,
Mahery, angamba, hoy ianareo ny fitantànako,
Nefa ho anareo zanako...

Satria, tsy misy maniry,
Ireo voa nafafiny ho ratsy faniry;
Samy mikolo sy mikely aina,
Mba ny soa no hojinjaina,
Hanana ny tsara hoandrandraina.

Na noana aza aho, ianareo no fahanako,
Ho anareo no nifaninanako,
Izay sitrapoko zary nobahanako,
Noho ianareo zanako...

Fa ho avy ny andro tsy hitsanganako,
Fotoana izay tsy maintsy handehanako,
Nisy anareo tety nisahiranako,
Izay no fiadanako...

Fa ianareo ho tsara faniry,
Hiroborobo, lavitry ny hirifiry,
Izay no valin-kasasarana,
Ho toa hasambarana,
Ho ahy any am-pitsaharana!
Oo! Oo! O!

Dadah Rabel
--------