Fasana Faharoa (Barijaona)
(Nalaina tao amin'ny tononkira.serasera.org)
Ilay fasako, fasana iany Fa ny foko dia fasana koa
Io no fasako ivelan’ny tany
Io no fasako iray faharoa
Tsy mba vero na mba rangolahy
No manafinan’ io fasan’ io
Fa ny nofoko zary manahy
No mandrakotr’omaly sy anio
Sentosentoko mamelovelo
Ranomaso toloko tsy tana
Izy ireny no sarin’avelo
Mitampody ka sarotra ialana
Ao ny nofo novolavolaina
Izay nisinda nalaky tsy hita
Ao no rendrik’ ilay nantenaina
Ilay sambo natao ho tafita
Ao ny tsantan’ny andro taloha
Sy ny hiran’ny fahazazako
No milevina ka tsy mifoha
Na noheverina mba hitondra ako
Sentosentoko mamelovelo
Ranomaso toloko tsy tana
Izy ireny no sarin’avelo
Mitampody ka sarotra ialana
BARIJAONA (J.J.Rabearivelo)
--------
Lien:
