Ikala Voahirana (Charles Kely)

IKALA VOAHIRANA


Voahirana ô ! sahirana aho
Mitazana anao mandihy
Banjinin’ireo olo-maro be
Ery am-pamoloana ery ê !
Ny ranjonao, ny sandrinao
Mandina maha- te ho tia
Miontsana mihorohoro
’Zay mitazana no toro

Dihy mantsy no lalao
Fiangalinao raha takariva
Tsinjaky ny vatanao
’Lay endrikao tsy ialana tsiky
Ny foko kely ao anaty
No injao midobodoboka
Mientanentana tsy tanty
Raha entin-drivotra
’Lay ziponao doroboka

Voahirana, sahirana
’Lay foko miha-saro-piaro
Mahita anao tsy mihafahafa
Sariaka tsy hilaozan-tafa
Ianao anie anaty rano
Malalaka tsy voafehy
Malefaka fitopatopa
Saingy tsy azon’ny kanosa

Rehefa ianao mankeny an-tsena
Mifanosina amin’ny vahoaka
Ny foko no mangenahena
Raha sendra sangy tafahoatra
Nefa satriko ihany koa
Ny hijery ny endrikao sariaka
Diso tetika avy hatrany any aho
Raha tsy nisaina ka nanao diso masiaka

Voahirana, sahirana
’Lay foko miha-saro-piaro
Mahita anao tsy mihafahafa
Sariaka tsy hilaozan-tafa
Iriko anie, iriko koa
’Lay toetranao tsy hisy very
F’ilay fitia avy ao am-ponao ao
No tehirizo ho ahy irery


CHARLES KELY
--------