MBOLA HO ELA (Charles Kely)

MBOLA HO ELA

Mbola ho ela zareo vao ho lany
Ny ora hiainana koa dia ho lava
Tsy mitsaok’ady fa miatrika adidy
Mitondra mangidy nefa tsy kivy

Mbola ho ela zareo vao hisava
Ny adim-pahantrana tsy vita kabary
Ny mivari-lavo tsy mahavaha olana
Fa ny mpivady no aoka hifanohana

Fa ny masoandro mena efa midina ambany
Misitrika ambadik’ilay tendrombohitra
Fa lasa ny alina
Mbola misolo mazava indray
Mitondra herin-tsaina vaovao
Ho an’izay mahatohitra
Fa mafy ady ê
Nefa tsy maintsy miady

Mbola ho ela zareo vao hiarina
Lela mizana mitanilanila
Fiainana an-tany natao zara vilana
Ireo mpitondra manao be fandroaka
Dia mba nisy nilaza hanao ampamoaka
Fa saingy tsy sahy f’izy indray no nanoatra
Ianao aza kivy ny manao ny marina izany
Fa misy mitazana antsika any ambony any
Izy ihany no hitsara

Avia moa sakaiza hitsoka farara
Tendreo ny valiha sy gitara
Raha hira sy vazo no hotantaraina
Isika tsy lany lazaina
Hadinoy aloha izay rehetra tsy nety
Fa andao isika hiatrika fety

Miara-milanja sy miara-mamindra
Izay no mba mamiko indrindra
Dia ny mahita ireo namako miara-mivazo
Miara-mampiakatra feo
Hanadino ny tazo
Dobodoboy ny ampoka
Aza misalasala
Mihetsika koa ny mpandihy
Aiza ianao ry malala !

CHARLES KELY
--------