ndremar ( 06/03/2018 12:29)

TSY HO ANAO (re)


Tsy dia ho anao ny ranomaso
Mandoto foana ny tarehiko
Tsy avy aminao ireny ankaso
Mampidify indray ny hehiko

Tsy dia noho ianao akory ireny
Sombon-tsento tsy hay nafenina
Koa mandehana, hoy ny teny
Mba sisa azoko tenenina

Tsy taminao ny ngidy lalina
Toa miampanga izany ratrako
Tsy ianao no nampisy alina
Maizin-kitroka tao an-tratrako

Tsy dia ianao no ho fanafody
Mety hahasitrana ny feriko
Tsy ianao no hahay hampody
Ny fahasambarako efa veriko


Tsy noho ianao no hiova loko
Ny andro iainako eto an-tany
Tsy taminao, no mba tsaroako
Ho nandrotsahiko ny tomany