Mpanjaka Antandroy (Lolo sy ny tariny)

Nisy Mpanjaka antanàna Antandroy
Niteraka zaza kambana roa
Ny reninjaza efa maty nafohy
Nandao ny tany mialoha

Ny Dadabe,dadaben’ny tanàna
Mpanolotsain’ilay Mpanjaka be
No niandraikitra ny fitaizana
Nanao izay nahalehibe

Nampianariny nangalatra omby
Raha tsy izany tsy zanak’Androy
Nampianariny nampiasa ody
Raha tsy izany tsy zanak’Androy

(Taranaka tena Zafimanarana izy
Taranaka tena manana tantarany izy)bis

Tonga vahiny,vahiny tandafy
Nitondra fomba fitaiza hafa koa
Fomba fisainana,fomba fitafy
Fomba nanova ny loha

Nisy ny hendry tsy mba nino lainga
Fa nankasitraka an’i Dadabe
Ny iray kosa dia lasa nanainga
Nentin’ilay vazaha be

Nampianariny nitana basy
Hiazana ny zanak’Androy
Nampianariny ny fomba ratsy
Hamonona ny zanak’Androy

(Tsy isan’ny tena zafimanarana izy
Lendaty tsy mety mino ny tantarany izy)bis

Tonga ny andro fangataham-bady
Araky ny fombafomban’ny tany
Lasa ny endry nizaha Omby tany
Hatao takalom-bady

Ndrisy fa sendra ny andiha-miaramila
Tao ilay Ndaty kambana aminy
Nifampijery nifampihila
Nitraka ny Basiny

Dia nasiny ny mpangalatr’omby
Basy lava sy ny basy fohy
Ka namaly ny mpangalatr’omby
Tamin’ny pilotra sy lefom-pohy

(Taranaka tena Zafimanarana izy
Taranaka maty teo ampiadina any izy)bis

Nisy Mpanjaka tanàna Antandroy
Nisaona ny zazakambany roa
Maty ny zanany, maty nafohy
Niady ka dia samy voha

(Tsy hitomany tsy hikika izy
Raha tsy izany tsy zanak’Androy)bis

(Taranaka tena Zafimanarana izy
Namohy ny dimby sy namohy ny farany izy)bis
--------