Omeo (Rija Ramanantoanina)

Dia mifitsaka mangina
Ilay zandry feno loto
Manondrika ny lohany
Mandinika ny tany
Itsahiny rehetra
Mitsinjo ho alehany

   Ny hodiany moa tsy misy
   Ny vatsy koa dia foana
   Ny ankoditra miharovitra
   Ny fafin’ny fanala
   Ny hovitry ny hatsiaka
   Iaretany avokoa ireo

       Fa trotraky ny fiainana
       Ilay tovolahy ka fanina
       Tsy hita intsony izay ho aleha
       Toa tapitra ny lalana
       Ka ny ainy ho lasa
       No hany sisa andrasany
  
          Ray o! Ny anio sy ny ampitso
          Izay anao raha sitrakao anomezo azy koa
          Omeo azy anio ny hazavana
          Izay tsy hitany hatrizay omeo azy Raiko o!

Dia nivadika ny taona
Nandroso teny ny andro
Dia hitako ranamana
Arahin-tovovavy
Mibaby zazakely
Mitovy loko aminy
  
   Fa zara raha mitafy
   Ity zaza menavava
   Matory eo andamosiny
   Toa taratra sahady
   Ny aloky ny ampitso
   Sy ny endriky ny fiainany

       Voatokana hijaly ve
       Ity zandry kely nihalehibe
       Tsy hita intsony izay aleha
       Toa tapitra ny lalana
       Izay alainy
       Tsy hita ho diavina
          
          Ray o! Ny anio sy ny ampitso
          Izay anao raha sitrakao anomezo azy koa
          Omeo azy anio ny hazavana
          Izay tsy hitany hatrizay omeo azy Raiko o!

                            
--------