TANANA HAOLO (Dany Ranoa)

Nilaozan’ny olona irony tanàna
Ka sina sy haolo !
Mirodana fototra irony tamboho
Narindran’ny ntaolo !
Mihotsaka ho azy ireo  hadivory
Mba aron-tanàna !
Mahita an’izany ny maso ka ory,
Ny fo tena hana !…

Ireo trano sisa mba hita mijoro
Tsy misy mitoetra
Fa haolo, mihiboka sy efa hikoro
Ka he, mampitsetra
Indreo alan-goavy no hita mameno
Ilay tokontany,
Sy  tsilon-draiketa omban-tsongosongo
Manampy an’izany !

Ilay vavahady fidirana tao
Indro tototra fako !
Fa rava daholo ny rindrin-tolana
Natao tamim-bato !
Haolo tokoa mantsy irony tanàna
Raha toa ka ilaozana!
Nahoana ary moa no hodian-tsy hita,
Tsy asiam-panavaozana ?…
    
              Dany Ranoa 1979
--------