Lolo (Erick Manana)

Maro ifidianana tsy hita ho tanisaina
Ny lolo lohataona ery an-jaridaina
Mahavalalanina raha ho tantaraina
Miambo sy mirenty re ka tsy hita izay hoalaina
Misosa mianavaratra misosa mianatsimo
Tsy mahalala sasatra fa dia mirimorimo
Ny raozy sy ny pika dia tsy misy izay adino
Orohana daholo fa samy vanona io

Refrain :
Manja ê manja ê manja ê ê ê
Orohana ny pika aloha ka manja ê ê ê
Enjehina ny raozy aloha ka manja ê
Tetezina ao an-kianja na felana na fanja
Indreny fa mihaingo sy mirenty ê ê ê
Ka isan’andro izao dia andro fety ê ê ê
Ny havo sy ny hiva dia voatety ê ê ê
Lolo eny aho ka lolo, miovaova volo
Ny maso dia efa folo, avia aty daholo

Mba araho maso anie ny lolom-boasary
Miravaka zandina hoy aho ka maha-te haka sary
Kanefa ny fietsiny dia tsy zarizary
Mitahy amin’ny lisy sy felan-draha miaro
Ny lolo anie ry Bako ka mitafy lamba mavo
Lalovany ny ahitra ka faly sady ravo
Omeny tokim-po re ny fanjan’ny voatavo
Fa ny tena tiany e dia voninkazo havo
Refrain

Misy mangamanga ka misoratra volory
Nefa anie ny hajany tsy fantany akory
Ny vonipaiso kely dia omeny sorisory
Kopahiny hihenjana ka tsy afaka mivory
Ny lolo lohataona dia mivolom-bolamena
Fantatra avy hatrany hoy aho fa tsy manaja tena
Na ny ‘telomiova tsy misodisody lena
Ny laingo mena koa ê mitsetsy zava-mena
Refrain…
Lolo eny aho ka lolo…

Ny lolo lohataona dia mivolom-bolamena
Fantatra avy hatrany hoy aho fa tsy manaja tena
Mamangy ‘telomiova sy ny songosongo mena
Ny laingo dia nafoy nitsetsy jakymena
Refrain…
Lolo eny aho ka lolo, miovaova volo
Ny maso dia efa folo, avia aty daholo
Lolo eny aho ka lolo, miovaova volo…
--------