Randrianirina (RABERANTO)

Aiza i dada o,
Mpananatranatra
Aiza i neny o,
Mpanafosafo anahy
Izaho ilay nariana
Teny an-jaoridira
Izay angaha no vintako
Sy anjarako

Tsy mipetraka aman’olona aho
Raha teo ianareo
Tsy voalatsa aman-kanina
Raha teo ianareo
Na mafy aza izany
Tsy maintsy iaretako ihany
Fa lasa mpanompokely aho
Ilay narianareo

Mba nahita fianarana aho
Raha teo ianareo
Mba nahay nanoratra
Raha nampianatra ianareo
Aiza ho aiza izao
No mba misy ahy
Amin’izao andro izao
Toa lasa badolahy

Ny anarako Randrianirina
Tantarako dia mahavariana
Izaho tsy hitantara lava
Izay voalaza dia mazava
Ny lambako rovitra
Ny tenako  mangovitra
Mangatsiaka re izaho
Fa aiza ianareo
--------