Lahatra (Rebika)

Aiza ianao rahavako
Hamafa rano amin’ny tavako
Sento no mameno ny fiainako
Zay rakotra alahelo
Fa mirotsa-dava
Toa ranomasonjaza
Fahoriana ny ahy
Satria marary anao ny fanahy

     Ranomaso tena fatratra
     Mirotsaka mipatrapatraka
     Raradraraka toa oram-pahavaratra
     Indro sakaizam-pandriana
     Lay havanao ô ry tiana
     Ny adin-tsaina
     mila tsy ho zaka zakaina

Indrisy ry malala
Zao tokoa ve no anjara
Tsy hay ialana intsony
Fa efa tora-bato avy any ambony
Zao tontolo izao
Tsy atakaloko anao
Raha voavidy koa ianao hifohazanao dia natao

     Betsak’ireo fahatsiarovana
     Nitoetra ka diso alahelovana
     Fadiranovana
     Mahatonga fahamoizana
     Toa alina ny antoandro
     Fa maizim-pito ny masoandro,
     Ry ambanilan’lanitra o,
     ’Zao no lahatr’Andriamanitra!
--------