Olom-boafidy (GHABY RATSITO)

Ravongana:    Nanaovako kabary nipaoka
                        Dia indro niroboka ny vahoaka
                        Nandatsa-bato hifidy ahy
                        Ka lany tokoa re ny lehilahy
                        Dimy taona ary izao no fetra
                        Ka indro niroboka ny vahoaka rehetra
                        Nanantena ny soa mba hiadanany
                        Kanjo (Hahaha)
                        Lasako mbamin’ny kely hananany

Vahoaka:        Azafady aminao ’zahay r’ingahy lehibe
                        Manantona anao manao rodobe
                        Ianao no vaofidy hitondra ny feo
                        Vonjeo ny madinika, tohano izy ireo
                        Nanome toky anay mantsy ianao
                        Fa hanampy amin’izay rehetra atao
                        K’ireo lokaloka sy dina voalaza
                        Dia aoka ho tontosa
                        Fa tsy ho kobaka am-bava

Ravongana:    Tsy zazakely sanatria ka baikona
                        Be re ny asako
                        ka ny hafa no ndeha antsoina
                        Ny fitarainana izany
                        toy very an-javony mazana
                      Ianareo koa anie ka tsy mahavery karama

Vahoaka: (mandohalika)
                        Andriamanitra ô! Ry Tompo Zanahary
                        Ny olombelona dia afaka manary
                        F’ianao irery no tsy mba mandao
                        Ka vonjeo re ny madinikao
                        Nefa mino sady manantena
                        Mbola ho tonga anie ny famonjena
                        Andriamanitra izay tsy andrin’ny sasany
                        Andrinay madinika ny asany.
(Mihoraka ny olona lany vaovao)
                        "Iny ny anay e! Iny ny anay e!"

Ravongana:    Veloma ry sezako volamena veloma
                        Ireo saika hanagonako ireo harena
                        veloma
                        Ilay nantenaiko hitondra soa
                        Kinajo aho voatsipaka ambava-fo
                        Fahiny aho nivoka nihiratriratra o!
                        Nitaingina fiara mamira-piratra o!
                        Ankehitriny aho kosa mikororosy
                        Zara mitaingina posiposy!

Vahoaka:        Onony ny saina r’ingahy Ravongana ô!
                        Aza asiana alahelo rehefa miongana ô!
                        Io seza anie ka hifandimbiasana
                        Ny vitana ihany no andrasana
                        Mionana (mionona re)
                        Ataovy veloma mandram-pihaona
                        Fa tsy ho ela akory ny dimy taona.
--------