Fa vetivety monja (AKON'I BETELA)

Araho maso anie iny rahona iny e
Izay tazanao eny ambony eny e
Matetik'izy ireo manao andiany
Miova sy miara-dia irony

Kanefa indrisy ireo fa tsy mateza
Ny fetran'ny tananan'izy ireo
Fa vetivety monja dia miova
Sy levona tsy ho hita izy teo

Raha sendra ianao misasak'alina iny e
No mba mijery ty hita eny ambony
Matetik'izy ireo manao andiany
Miova tsy mifankatia irony

Kanefa indrisy ireo fa tsy mateza
No fe-potoana ahitana azy ireo
Fa ora vitsy monja moa raha ela
Ho takona tsy ho hita izy teo

Tsinjovy izao ny rahona jerena
Izay rehetra misy eto an-tany
Na fikasana ihany na harena
Miserana tokoa sy mora lany

Indrisy anefa fa mandalo saino ihany
F'irony izay rehetra irin'ny fo
Kanefa re raha tapitra ny aina
Dia afoy ireo fa zava-mety ho lo

Hevero ihany re izay hiafarana
Tsy mety ny hanjeny andro lava
Safidy izao anie ka tsy ho tana
Fa vetivety dia ho lo sy rava

Ny olona kosa raha handao ny tany
Dia manam-petra sy ho lo
Raha toa ianao miandany amin' izany
Dia manantona ilay Mpamonjy soa

A/C: RADOFA EMILE
--------