Satry ihany (Mahaleo)

Satry ihany ho tsiky no hameno, handravaka ny tavanao
Mba tsy hikentrona intsony ny tarehy
Satry ihany ho hira no heno, hivoaka ny molotrao
Mba tsy ho taraina intsony no ho re

Indrisy anefa mbola tomany
No manamando toa ny tava
Noho ny fahoriana misesy
Mbola toloko ihany
No mivoaka ny vava
Fa fahantrana tsy mety resy

Satry ihany ianao tsy ho noana, ary koa tsy hangetaheta
Mba tsy handry fotsy lava izao
Satry ihany izay manoloana, tsy ho feno herisetra
Ka hilaminan-tsaina fehizay ianao

Indrisy tsy misy niditra am-bava
Ny tenda koa zary maina
Ny tsy fisiana tsy mahavoky
Mbola tebiteby lava
Tsisy hilaminan-tsaina
Sady kivy ianao no ho very toky

Ianao miezaka hatrany
Mihoatra ho tafita
Tsy miraviravy tanana
Tsy maintsy mbola hivaly ihany
Tsy maintsy hahita
Ny anjara fiadanana



           (nohirain’i Dadah
            Album Ilay Nosiko)
            
--------