Kambana (Mahaleo)

----
Anio ianao no nifidy ho avy
Hameno isa anay mivady ho mpianakavy
Efa ela naniriana hanana kilonga
Anio ianao no ho tonga

Ny ranon-doha efa vaky
Mba hanamora ny dianao mba halakilaky
Reninao te hivoaka matetitetika
Hay ianao no manesika

         I koto sa i kala
         Iza no mahalala
         Mety ho iray, mety ho roa
         Tiako avokoa
                  Fa izay tonga tsy ho laviko
                  Fa ho lalaiko, ho tiaviko
                  Satria tompon’ny hoaviko

Tonga Rasazy namazivazy
Hoe « aza taitra ianao rangahy f’io mandeha ho azy »
Rehefa nitsapa izy dia nilaza
« Efa akaiky, akaiky ny zaza »

« Raha vonona ianao dia miakara
Mitsilania etsy ambony farafara
Eo ambonin’ny tavy no misaveraka
Tsitsio ny aina ndrao dia reraka »

         I koto sa i kala
         Iza no mahalala
         Mety ho iray, mety ho roa
         Tiako avokoa
                  Samy ho tiako daholo
                  Na iray no eo na folo
                  Izaho vonona hanolokolo

-----
Nanomboka ary ny ady lehibe
Ny fanenan’i Neny no hany sisa re
Ny fikekekezany, ny tabataban-dRasazy
Manome torimarika ho azy

Izaho nandositra tsy sahy nijery
Fa aleo izy ao, aleo hiady irery
Tany an-dalantsara aho no nisomebiseby
Kivikivy sy nitebiteby

         Mba ho tafavaokany ve
         Asa re
         Izy anie mbola tsy zatra
         Ndrao maratra
         Fa ny saiko mizarazara
         Miandry izany ho anjara
         Na ho ratsy na ho tsara

Nivoha ny varavarana
Dodona ery aho nanarangarana
Ny fitsikin’i Neny no nitsena ahy
Hoy izy hoe: « kambana vavy sy lahy »

Nihazakazaka aho nanoroka an’i Neny
Nijery ireto kambana aho tsy nahateny
Iray no nantenaina, roa indray no tamy
Hafaliana ts’isy ohatr’izany

MAHALEO
--------