Mbola zaza (Olombelo Ricky)

Mbola zaza ’lay fitiavako
Dia voafingana sahady
’Lay fonenany namboariko
Nanjary fo mangadihady
Nifandimby nifanesy
Nifanosika ny taona
’Lay fitia mbola resy
Gina, maina, sady moana
Dia nofadiako hatreo sy natahorako tokoa
Ny hanandrana haneho
’Lay fitiavana any am-po
Nitampify, nihafihafy tsy sahy
Nangina tsy nahaloam-peo
’Lay fitiavana izay mbola manahy

Kanjo indro indray maraina
Nisy taratra hafa loko
Masoandro tsy hay tohaina
No nandonaka ny foko
Ka taitra ilay fitiavako
’Lay fitiavako, mangovitra
Natahotra fandavana
’Ty lamba anefa rovi-drovitra

Teny roa toa teny iray
Eny vokatry ny fo
No nanome aina indray
Ilay fitiavana tao am-po
Efa maro ireo niantsoako anao
Tsy nahalaza ilay anao
Dia ilay ianao nahay namelona
Ilay fitiavana tanatiko tao
Fitiavana no iantsoako anao
Fitiavana tokana iray
Ireo no nahalaza ilay anaranao
Ilay fitiavana mandrakizay

Fitiavana no iantsoako anao
--------