valin-kafatra (Naly Rakotofiringa)

VALIN-KAFATRA

Io ’lay vorona mivimbina hafatra ho anay
Tonga soa ny hafatra koa dia voaray
Any ampitan-drano mantsy no misy azy ireo
Ny endriny miafina fa heno kosa ny feo

Fiv:
Vorona ô! Mahita ’reo hava-tsy foy
Hody ianao ka dia mba kalokaloy
Raha misento e ny any, ny aty mitomany
Mbola hihaona any indray andro any

Izy vitsika momba kitay
Lasa lavitra avy eto aminay
Izahay nilaozan-tsakaiza
Te handeha nefa tsy afa-mankaiza

Izy mipitrapitra irery
Dia nihevitra tena ho very
Izahay maniry ho any
Nefa lavitra loatra ny tany

Fiv: Vorona ô!......


Naly RAKOTOFIRINGA
--------