Jamba (Mahaleo)

(Nalaina tao amin'ny tononkira.serasera.org)
Jamba aho eny jamba
Nilaozana hazavana
Tao anaty aizim-pito aho
Aizina tsy azo hialana
Loko tokana ihany
No mba navela ho ahy
Dia ny maintimainty izany
Tsy misy ny ankoatr’izay
Nefa rahavako
aminao no hiara-dia
Ka navelanao ho tazako
Ny lokon’ny fitia

Moana aho eny moana
Tsy mba navela hiteny
Raha te hiresaka aminao aho
Ny tanana no ahetsiketsik’eny
Soa fa nisy tanana aza
Azoko asoloko ny vavako
Ahafahako milaza
Fa anao ny fitiavako
Tsiky eny tsiky
No nasetrinao izany
Tsy navelanao ho kivy aho
Raha mbola anilanao ihany

Malemy aho eny malemy aho
Tsy afaka hijoro akory
Enta-mavesatra ho anao
Hahatonga sorisory
Fiantrana fotsiny ihany
No mahatonga anao ho eo
F’izay any am-ponao any
Mandratra ka tsy tianao ho haseho
Nofihininao ny tanako
Ka hoy ianao hoe mangina
Fa ny andro sisa hiainako
Natokako ho anao ry tiana
Nofihininao mafy ny tanako
Ka hoy ianao hoe mangina
Ny ranomaso naneniky ny tavako
Ranomasom-pifaliana

N’inona voina mety hitranga
Tsy zanaky ny hafa ianao
Ny voahary tsy tia banga
Hisy hitoetra eo anilanao
Ny jamba hisy hitantana
Ny moana hisy handre
Ny tsy salama vatana
Hisy hampianatra handeha
Ny jamba......
--------
Rohy: https://tononkira.serasera.org/hira/mahaleo/jamba-2
Hametraka hevitra
Midira aloha
Momba ny hira
Mpihira : Mahaleo
Vangy : 18764
Mpankafy : 0 Ankafizo
Nampiditra :
Daty : 27/10/2001 23:10
© serasera.org 1999 - 2023 - page load 0.0513