Voahirana (Henri Ratsimbazafy)

Iriko loatra ny mba hioty anao
Handravaka ilay tokantranoko ao,
Nefa dia noraisinao ho vazivazy,
Tsy mba tianao ny voatery ao anaty vazy

Satrinao foana hiliba sy hilalao
afoavoan’ireo zay manindrahindra anao ;
mazava fa satrinao hitoetra irery
ho voadokadoka ary koa ho voajerijery

Ry Voahirana ô !
voninkazo dia
Ry Voahirana ô !
mpilalao fitia
Mitandrema fa sao ianao dia sondrianana
mankafy raha safosafoin’ny riana

Isan’andro izao,
ireo voro-mandalo
dia midera anao
amin-kira sy kalo,
’reo zozoro sy ny herana koa
dia mitsaoka sy miondrika aminao avokoa.

Sao ianao
mino ireo lokaloka,
Sao ianao
maka ireo dokadoka,
sao ianao dia manaiky avy hatrany
ireo toky nomena an-tendron’ny molotra ihany !

Ry Voahirana ô !
hatsarao ny saina
manahirana
anie ny miaina

Ary ianao koa anie voninkazo
any andro any volana dia tsy maintsy halazo.

Henri RATSIMBAZAFY
1962
--------