Ny tia tena tia (Henri Ratsimbazafy)

Anaka,
Teo ianao dia nanontany
ny amin’izany hoe tia izany,
koa satria ianao moa tiako
dia tsy maintsy ho valiako.

Fantatro,
matetika ianareo tanora
mihevitra fa moramora
ka azo atao kitanitany
izany atao hoe tia izany
kanefa tena mbola zava-dalina
ka ilana saina malina.
Henoy ary fa ho lazaiko
izay mba takatry ny saiko.

NY TIA TENA TIA
dia mbola zava-tsarotra
fa tolotra doria
tsy misy adi-varotra

NY TIA TENA TIA
tsy maka fa manolotra,
kanefa sanatria
tsy hoe an-tendro molotra.

NY TIA TENA TIA
mamoy ny fahafahany
f’izany no sonia
sy fenitra arahany,

NY TIA TENA TIA
mandao ny fonenany
manaiky sy minia
mamatotra ny tenany.


Henri RATSIMBAZAFY 1968
--------