Dinika mialoha ady (Ifanihy)

Nidinika ela dia ela tokoa tao anaty sahany
I kaky Rabeza mpanao dabokandro sy ny akoholahany
Rabeza somary misotro labiera eo ambony barika
Ralavasanga mifitsaka tsara ao anaty sobika

Dia nanontany ary i kaky Rabeza ka nanao hoe :
Ahoana ihany ilay amin’ny alahady efa mba vonona ve…?
Tandremo kely manao ankinanga fa sao dia ho very
Raha resy eo dia ho afabaraka amin’ireto mpijery

Efa andro maro amam-bolana ialahy no nokolokoloiko
Nomena sakafo,nomem-panafody, nitokam-pisoko
Vola aman’alina no efa natokako mba ho am’izany
Tsy maintsy mandresy no fantatr’ialahy fa izay lany eo dia lany

Nikopaka kely ity akoholahy raha hamaly an’izany
Kaky Rabeza ô…patrô-ko, tsy foiko eto an-tany
Sanatriaviko mandrakizay ny hamitaka anao
Fa ho entiko masaka hatrany am-bilany ny dina natao

Mandria enao eo ivohon’ny vato raha ny amin’ny alahady
Fa ny anjomaran’ilay fandresena toa reko sahady
Ny famporisihina ihany ry kaky no ataovy matevina
Fa raha izaho indray no ho resy amin’io dia aleoko milevina

Ilay Volomboahirana indray hono mantsy no hanao amiko
Ny tokonaina dia misy tokoa fa tsy maintsy ho laniko
Izay iny avy ve no mba miseho ho mahavita azy
Akoho sahozanina, kely sakafo, akoho migarazy

Andraso kely fa raha vao mibika, mibika, mibika
Dia mody tsenaiko amin’ny endrika mirana, faly sariaka
Romotra be dia manao anjolofo, mamely, mamely
Avelao hikopaka sy hamely fantsy fa hieretako kely

Rehefa ho dila tokoa ihany mantsy ilay adin’iray
Ho vizaka mafy Ravolomboahirana, godro am’izay
Hitaky daholo ny odim-bomanga sy ny vary masaka
Fa vary masiso no fihinan’ireny fa tsy mba ny katsaka

Eo vao asehoko ilay fomba fiady tsy manan-tsahala
Dia ireo tenda kely sy ireo velon-tenany be manadala
Rehefa malemy ka mbola tsy vatran’ny tompony esorina
Dia vaomainka rakofako fantsy mba ho lasam-borona

Iny am’izay ary fa tafapetraka, tafatorovoka
Tsy fantatra intsony Ravolomboahirana fa hiosom-bovoka
Somary roahako mody amin’ny tsaingoka mahalakalana
Ateriko hatreny amin’ny tompony mihitsy raha tsy hitany ny làlana

Ho hitan’i kaky eo i Volomboahirana rehefa hitsaoka
Fa hifampisamborana sy hifamonjena any anaty vahoaka
Ho azon-tsika ny dera, ny laza sy ny voninahitra
Ka ny akohovavy rehetra vao mahita ahy dia milahatra

Izay ary no izy ry kaky Rabeza, sotroy ny labiera
Sao sasa-miandry ireo any am-pisoko, fa mandeha ny lera
F’ity teny fohy, dinidiniho sy tsakotsakoy
Rehefa mandresy aho, ny vadiko re mba soloy
--------