Ny adiadinay fahiny (Ludger Andrianjaka)

Ny adiadinay fahiny
Manjary ahalelovako azy
Mandainga izay tsy hanan-tsiny
Dia izany ve no hanjary ho sazy

Ny hijanonana tsy hiaraka
Hifandao sy hisaraka
Hifonako ny lasa
Izay heviny no asa

Vetsom-pitiavana ao anaty
Afo ao am-po tsy mety maty
No miantsoantso ka mihira
Miverena indray ka midira

Ny fisarahan-toerana ela
Mampitadidy ny andro lasa
Iza no tsy hifamela
Hanova ho tsara ny fikasa

Raha ho tapaka ny tady
Izay namatotra azy izay
Tsy ekeko raha ny adiady
No hamoizana mandrakizay

Fandalovana ny eto an-tany
Aoka re mba hifamela ihany
Vita ny hira ka indro aho manontany
Hody ve hono izany havako izany
--------