NY VADIKO (Voahangy)

Tonga indray ianao rehefa avy vizana nandeha
Nivenjivenjy tany ambadika any
Tsy niarahaba ianao, toa tsy nanoroka ahy fa hoe
Handalo hisolo akanjo fotsiny ihany
Toy ny fanaonao rehefa miserana ohatr’izao
Manopy maso kely an’ireo ankizy
Hendry ve i Bodo? Mianara tsara ianao, ry Jao
Tafandria mandry izato izy.

Mipitrapitra fotsiny no hany vitan’izy ireo
Nozarinao nilaozana eto foana
Tsy hainy ny nandao, tsy hainy koa ny mitoreo
Satria ianao tsy eo mandavan-taona
Na izany aza anefa ny sakafonao
D’hofonosinay hafana tsara
Isan’andro izany, na ho avy na tsy ho avy ianao
Ianao mantsy aminay tsy diso anjara

Fiv.: Fa mbola tiako ianao
       Mbola tiako sady mamiko
       Mbola tiako ianao
       Tiako mandram-pahafatiko

Ny havako, ny namako, ny rehetra ao an-tanana
Manebaka ahy ho adala avokoa
Ny tondro-molotra, ny fosafosa ao am-piasana
Dia hazofijaliana ho ahy tokoa
Nekeko anefa ianao teo amin’ny lanitra sy tany
Nekeko f’ilay vady izay finidy
Koa asakasantsika izay mivadika amin’izany
Ny zaza koa iretsy mbola adidy

Any andro izay tsy hiantsoako anao hipody
Hiverenanao eto aminay
Ho ranomaso angamba no hitsenana anao mody
Dia ranomasom-pifaliana izany
Eny na dia aza eo am-pialana aina
Fotoana fohy mba hiarahantsika
Hifamela isika, hamela anao aho sombinaina
Raha izay no fiainana mba vita.
--------