ANATRA SAROBABAY (HANITRA NENTIN-DRAZANA)

Alana aloha ny tsiny, fa sao dia mahavoa
F’izany no fomban’ny  ntaolo teo aloha
Ny lalana voasoroka tsy sarotra aleha
Na osa na matanjaka, dia ho afaka mandeha

Dia atomboka ny tantara
Ianareo vahoaka mihainoa tsara
Na eto aloha re na any afara
Aza matahotra ianao ts’isy ho diso anjara

Fa ny hendry ihany no anarina
Ny olo-marina no atao ho fianarana
Mba fadio re ny fihetsika tsy voahevitra
Anatranatra ity k’aza mora tezitra

Marina e ! marina a !
Marina tsy misy lainga izany teny izany re rahavako ô!

Fa raha nisy hono tovolahy
Mba nambinina noho ny hafa
Dia nisetrasetra sy sahisahy
Nanamavo ny ory, nanjakazaka
Fa nahangona be dia be
Dia nieboebo, nirehareha
Ilay rainy aza niàlany
Na ny reny niteraka nadakany
Dia nampakatra feo, eran’ny tanàna
Nampidera fananana sy hadalana
Ny efa be eo an-tanana tsy nampionona
Ny an’ny namana indray aza no nahorona

Marina e ! marina a !
Marina tsy misy lainga izany teny izany re rahavako ô!

Ireo mba nitady fihantrana
Niatahana lavitra nialàna
Ireo olona nitaraina
Natosi-boho tanana niala-maina
Ny hany havana dia ny vola
Ka nandany andro nandeha nidola
Izay ampitso tsy ahoako izany
Ny hitako aloha dia ny anio ihany
Na mahantra aza ireo mpiray tampo
Efa anjarany ny azy atao ahoana moa
Honahona ny fiainana tompoko ô!
Ka raha latsaka ianao tsy adidiko ô!

Marina e ! marina a !
Marina tsy misy lainga izany teny izany re rahavako ô!


Ho tohizako ny tantara
Atongilano ny sofina henoy tsara
Toy ny saonjo eny an-tsaha misy mamarara
Ity tantara niseho toa nangidy fara
Ireo fananana be dia be
Izay nampidola nirehareha
Toy ny rano eny an’ony la mety ritra
Tena tapitra fongana ts’isy hita
Tonga saina no nihafarany
Nigogogogo, nihatatra nitomany
Ireo sakaiza sy namana eo an-tanàna
Toa nilefa sy nihataka tsy voatàna

Akanga niditra ny ala, niandry ny oran-kisava
Vao tratry ny haizina ô! ‘zay tsy azo laizina
Nenina sisa azo atao, solafaka ity havanao
Mifona aminao re r’ikaky ô! Mivalo aminao  aho Neny ô!

Ny anatra omena re hono re roy ka sarobabay
Izay voany aza tezitra na mitaraina miovà amin’izay

Ny anatra omena tsipak’ombalahy, hoy aho e!
Mahavoa mahafaty izy io anie r’ingahy, hoy aho e!
Izay manao ditra ka tsy mba mihezaka, hoy aho e!
Manao tsingerim-panina amoron-tevana, hoy aho e!

Raha nakarin’ny vintana ianao sombinaina, hoy aho e!
Mba tsimbino ‘reo Havana, izay mitaraina, hoy aho e!
Aza manositosika ireo ondry botry, hoy aho e!
Aza asiana fiangarana, hitovy torosy, hoy aho e!

Ny anatra omena re hono re roy ka sarobabay
Izay voany aza tezitra na mitaraina miovà amin’izay

Tano ny fihavanana aza ariana re, hoy aho e!
Aza avalona fotsiny ny firaisan-kina re, hoy aho e!
Ireo hava-mahatratra tsy azo ialàna, hoy aho e!
Ts’iza f’ireo ihany no mbola hiafarana, hoy aho e!

Ny anatra omena dia sarobabay, hoy aho e!
Izay voany aza tezitra, samia mùandray, hoy aho e!
Andriamanitra Ray dia mijery midina, hoy aho e!
Izay langa famindra dia mitsingidina, hoy aho e!

Akanga niditra ny ala, niandry ny oran-kisava
Vao tratry ny haizina ô! ‘zay tsy azo laizina
Nenina sisa azo atao, solafaka ity havanao
Mifona aminao re r’ikaky ô! Mivalo aminao  aho Neny ô!


                RAKAZY
--------