ALANA ALOHA NY TSINY (HANITRA NENTIN-DRAZANA)

Alana aloha ny tsiny,fa sao dia mahavoa
Izany no fomban’ny ntaolo teo aloha,
Ny lalana voasoroka natao arabe
Ma tsy ho voan’ny tsilo ireo olona mandeha

Avadika ny kasety
Mba hiankina amin’ny vaventy
Ka raha misy teny voaray
Aoka tsy hakasika anay
Fa raha misy zavatra kasaina
Manahirana ny saina
Misy tenin-drazana manao hoe:aza misy ny sampona

Misy resaka tiana hambara
Ianareo vahoaka mihainoa tsara
Raha lavitra ianao,manantona aty
Ampandrio ary ny sofina ankavia
Fa resaka hanitra kely ity

Marina e! marina e!
Marina tsy misy lainga izany teny izany rahavako

Ny sasany ao an-tanana
Voan’ny sery mahery
Ka tsy tonga izy mba hijery
Ny fotoam-bita hoy ny zoara tsy mahaleo ny sampona

Raha nisy hono zazalahy
Nankany amin’Ingahy mpimasy
Dia izao no teny mba nataony
Ny anton-diako aty ange r’ingahy mpimasy
ka hitsapa vintana
Na ny vintana no tsy tsara
Na misy zava-manarona
Fa in-dimy nanambady anie aho r’ingahy mpimasy
fa nilaozan’ny olona

Marina e! marima e!
Marina tsy misy lainga izany teny izany rahavako

Dia nitsangana ingahy Randria
Dia noraisiny ny valiha
ka izao no teny nataony:
Tsy ny vintana no tsy tsara
na misy zava-manarona
fa inty misy kely mitangozana
Ianao tsy mihaino tenin-drafozana
Tetik’adinao fitonjato kilao
Ny hakamoanao misy taonina iray
ka mieritrereta

Marina e! marima e!
Marina tsy misy lainga izany teny izany rahavako

Ho faranana ny tantara
Fa raha lava loatra mangidy fara
Ny tso-drano ataoko anareo
Na Alahady na Alatsinainy
Ho salama vatana anie ny aina
Na talata na Alarobia
Tsy ho azon-tsampona sanatria
Na Alarobia na Alakamisy
I losifera ho foana tsy hisy
Na Zoma na Asabotsy
Jesosy Tompo handrotsirotsy

Akanga niditra ny ala
Zovy indray no tsy hiala
Veloma masina,veloma indrindra
Fa amin’ny ho avy ’zareo manao misimisy
Tsy satrinay anie ny handao anareo
Fa ny andro ’zareo mandroso hariva
Veloma masina,veloma indrindra
Ny fahasalamana izay no irina
Akanga niditra ny ala
Zovy indray no tsy hiala
Veloma masina,veloma indrindra
Fa amin’ny ho avy ’zareo manao misimisy

                    Tonony sy feony:DÔLY
                 Sampana HANITRA NENTIN-DRAZANA
                 FJKM ZOARA FANANTENANA AMBOHIPO
--------