paiso ra-kena (Mahaleo)

Vokatra ireo paiso ra-kena
Mirehitra ireo azo mivoara mena
Ao avaratry ny abatoara
Mihintsina ireo masaka

Alakamisy hariva andro tsy fianarana
Mifampitantana izay roa lahy
Ho any avaratrin’ny abatoira
Hangalatra ireo paiso ra-kena

Mena mena asa raha tadidin’ialahy
Mena mena ny lokon’ny fahatsiarovana

Rehefa tonga eny ambony paiso
Hidiko ny varavarana
Manasaraka ny ambony sy ny ambany
Ny lanitra sy ny tany

Ny lanitra azo tsapaina tanana
Ny papango nanjary namana
Ny vavanay roa lahy amin’izany
Boba-dra amin’ny paiso ra-kena

Mena mena asa raha tadidin’ialahy
Mena mena ny lokon’ny fahatsiarovana

Indray alakamisy izy tsy tonga
Fa lasa nifindra lavitra
Sendra hariva mena masoandra
Noheveriko fa fara-andro

Nody ao tsy saha nangala-paiso
Nifampitantana izao sy halaheloko
Ao avaratry ny abatoara
Mihintsana ny fahatsiarovana

Rehefa lehibe izao hamboly paiso
Ny tokontaniko fenoiko
Ho vokatra ireo paiso ra-kena
Ho tonga ireo ankizy hangalatra

Mena mena asa raha tadidin’ialahy
Mena mena ny lokon’ny fahatsiarovana


(Bekoto)
--------