OLON-TIANA (Ny Ainga)

OLON-TIANA

Tena sambatra ny manana olon-tiana
Olona iray tena tiana sady tia
Mifampitantana tsy resim-pihafiana
Fa fitiavana nomena ho doria

Na dia misy izay mambabo an-dalana eny
Tsy mizara roa ny fony fa iray
Tsy atakalony harena ilay nekeny
Fa ny azy rehefa iny dia izay

Rehefa lasana any an-tany lavitra any
Ny eritreriny manjohy mahatsiaro anao
Raha sehatry ny sedram-pahoriana
Indro izy eo anoloana tsy mandao

Fomban-javatra ny miady ombieny ombieny
Fa ny marina izy tsy mahafoy anao
Na dia tsotra ianao dia tsy mba afoina ho irery
Tiany ery ny misakambina aminao

Tena very izay manary olon-tiana
Aza ariana hoy aho raha mbola mba mitia
Fanajana aloha no atolotra mangina
Mifanaja dia mateza ny fitia
--------