Asabotsy hariva (Hery RALAINARIVO (Lapé))

Ny asabotsy hariva
Ilay folaka iny ny andro
Dia fihaonana indray
Eo am-bavahady
Miaraka amin’ireo namana
Aman-tsakaiza
Mba hifankahita indray
Fa tapitra ny herinandro.

Efa rera-tsaina
Sy godron’ny fianarana
Ary koa ny asa aman-draharaha
Andavanandro
Dia mifampitaona indray
Eo am-bavahady
Mba hifampitantara
Izay rehetra natao tany.

Ny asabotsy hariva
Eo am-bavahady
Eo indray no mifamory
Ny ankizy eo an-tanàna.

’Reo hirahira
Dia tsy mety adino velively
Fa io no tena mahasarika
Na ny lehibe na ny kely
Mafana ery ny resaka
Tsy mahatsiaro reraka
Fa samy mitangorona eo
Na ny vavy
Na ny lahy.

Ny asabotsy hariva
Eo am-bavahady
Eo indray no mifamory
Ny ankizy eo an-tanàna.
--------