NY MARAINA VAOVAO (Redona)

Antenao fa mbola hisy ny maraina vaovao
Hanonerana ny lasa izay nalaina taminao
Voa nafafy ny fahiny mendrika ny ho tsarovana
Manan’aina izay hitsiry ka tsy ho resim-pahalovana

           Raha ririnina ny andro dia mihitsana ny ravina
           Zary resy ny tontolo maizin-dalàna ho diavina
           Nefa ao ny lohan-taona izay handimby sy hisolo
           Hapitrebona indray ireo voary niongo-bolo

Raha midify ny masoandro ka mikitroka ny haizina
Dia ekeo am-pahendrena fa anjara tsy azo lavina
Hitoriana fahosana ny mandefa fitarainana
Fa mizàna tsy mandainga ny mitondra ny fiainana

             Moa ny alokin’ny lasa nobanjininao maharitra?
             Moa ny taratrin’ny ho avy tsy mba hitanao mamaritra
             Mahina aho satria nahoana? ndrao variana loatra ianao!
             Ka ho dison’ny haizina ilay maraina vaovao!

Jashine (Redona) concept 2007
--------