IZAY IRIKO HO ANAO RY TANY MAMIKO (Chorale Ny Antema)

Izay iriko ho anao ry tany mamiko
Dia ny hiadana sy handry fahalemana
Hiray fitempo fo ny mpiara-belona amiko
Kapoaka tokana no gohina itelemana
Tanindrazana no rivotra iainana
Aina anaty tsy voazaran’ny fisainana
Andriamanitra fitiavana no ivavahana
Hitondra soa anie ny tolom-pahafahana

Izay iriko ho anao ry tany tiako
Dia fitoviana, hajan-jo , tsy fanavahana
Ka eo ny rariny sy marina takiako
Ho heno hanjary hanitra ankasitrahana
Firenena no hery velona mitambatra
Hijoron’i Madagasikara sambatra
Andriamanitra fitiavana no ivavahana
Ho anay vahoaka te hiaina am-pahafahana

Izay iriko ho anao ry fireneko
Dia taranaka hitraka tsy hay vozonana
Ka izay feom-panahy henoiny no ho reko
Hitaky soa dia ady masina iombonana
Tolo-tsaina tsara paika sy voakendry
Mba hananan’ny hoaviko olon-kendry
Andriamanitra fitiavana no ivavahana
Ho tonga anie ny fahendrena, fahafahana

Izay iriko ho anao ry tanindrazako
Dia ny hiravahanao ny satro-boninahitra
Ka ny dinitra sy ra no hiotazako
Na dia handraofako ny fara-vodifahitra
Inoako, henoko, antenain’ireo taranako
Fitiavana hanandratra ny tarigetra tanako
Andriamanitra no tokana ivavahana
Mba hitrotroako ilay amboaram-pahafahana

Saina matotra, mijoro
Hery tsy misetrasetra
Fanahy natoro ,ka hanoro
Hiadanan’ny rehetra
No hiasako ka hanasinako fa tsara
Ianao, ianao ry Madagasikara

LEST ANDRIAMBELO
--------