Mamy ny asa (Hary)

Lahy antitra fotsy volo
Mihodi- barahina mena
Nofo miketrona daholo
Tsy nify mba misy ho jerena

Mipetraka ambonin'ny vato
Andrefan'ny trano zozoro
Anilany eo ny harato
Miantona hita mijoro

Ny akanjo fitafy taloha
Malabary lomoron'ny rano
Mikipy izy sy miharin-doha
Manatrika ny andro efa mamo

Mijery sy tena variana
Misaina ny fiainany rehetra
Hasambarana sy fahoriana
'Ty zato taona mbola mitoetra

Mitsiky izy milaza fa marina
Ady izao fiainana izao
Feo malemy sy feo farimparina
No ilazany hoe mbola hohitanareo

Ady, hoy izy, nefa dia mamy
Matoa hiaretana tahak'izao
Saingy ianareo amin'izany
Mirongo fitaovana vao

Tsy ho vizana hitondra fivoy
Tsy hatory amin' tsihy efa lo
Ny fijalianareo dia ho fohy
Ny vokatra hahafam-po

Ny andronareo ho voafetra
Anaty lanitra tony dia tony
Ary rotsim-baliha no hitoetra
Amin'ny oran'ny fahamamony

Feony sy tonony : Jerôme Randria
--------