Iny alina iny (SAMANTHA SY KAYAH)

Nanakotsaka toa nandambolambo ilay alina mamirifiry
Tonga ny eritreritra / mijery ora hoe amin’ny firy ?
Malahelo ary te hitraotra hijery ilay salovan-tavanao
Tsy nahandry ny andro maraina fa hoe izao dieny izao
Kanefa indrisy tsy afa-manoatra fa ny andro koa mbola alina
Ka ilay tsiky mandravaka ny tavanao no nisainako lalina
Ilay tsiky eny amin’ny tavanao no bodofotsy mba norakofako
Te ho rakotry ny teny mamy ka ny lohako no nosaromako
Nofy ve hoy aho? Hay tena zava-nisy marina
Diboka ny hafaliako ! ny lanitra no tsy haiko takarina
Zara aza aho tafarina ! tojo izay tena irina.
Ka ilay sary no handrotsirotsiana / fihinina eo am-pandriana

Ka iny alina iny sanatria ve ho hadinoina
Hampiakatra ny vetsovetso ny fitiavana no ampitomboina
Ka haniry ilay fitia. / Hananik’avo no hiafarany
Velirano efa napetraka moa ilay hizara mangidy sy mamy
Hananika ilay tendrombohitra izay halan-janak’olombelona
F’isika roa ! ilay irin-kofaty kay vao ela velona
K’iny alina iny dingana sahady any amin’ny fahasambarana
K’iny alina iny no nahatsapana fa ho tsara ny tantana

Réf: Iny alina iny aho nanofinofy anao’za
        Iny alina iny aho nahatsiarotsiaro anao’za
        Iny alina iny aho nanofinofy anao’za
        Iny alina iny aho nirediredy anao’za

Cherie ô / maro ny fotoana fa mamy indrindra iny alina iny
Ka avelao aho hitantara aloha dia aza omena tsiny
Nanofy anao ny tenako ary mbola ts’isy ohatr’izany
Malalako ô . fa inona aky no mahatonga izany
Nefa ianao toa teo anilako ihany nefa no natory
’Zaho raha torimaso mantsy tamin’iny dia tena ory
Mivadika aaah! / mivadika oooh!
Dia ilay nofy sisa na hany nalahelo hoe : ntsôôô
Ianao tsy foiko ho fohazina  fa tiako ho tambatambazana
Ilay nofy tsy tiako ho tapaka / sady ny tenako efa valaka
Dia naleoko nihafy kely sao hanjary hafa izay hanaraka

Raha mitohitohy kely ireny  / tsy tiako haraina intsony ny andro
Satriko foana hitohy ireny  / ho foana ny vonjy tavan’andro
Alina toa nisafosafo / toa tena kisoka nampiangola
Raha azoko nobataina nentiko / ary netiko nidoladola
Milolalola izay tsy manana / ary be fialonana indray
Reharehako ilay alina iray nanadinoko ireo kakay
Zarako aza nisy an’iny ahamiramirana ny tavako
Hitsikiko aminao ’zao / sa tsy izany aky rahavako



Réf: : Iny alina iny aho nanofinofy anao’za
          Iny alina iny aho nahatsiarotsiaro anao’za
          Iny alina iny aho nanofinofy anao’za
          Iny alina iny aho nirediredy anao’za


Hivoaka ny trano moa tsy afaka / hijanona manaintaina
Ka hany hery sisa miandry fa ny andro tsy maintsy haraina
Hijery ilay Toky ny Aina / hanoroka sy hampatsiaro
Fa iny alina iny aho tsy nitsahatra ny nahatsiaro
Ilay Ony hikorinan’ny sambo kely nandosirana mpitondra
Ilay hany nanafaka ahy fony ny foko tany am-ponja (…)
Ka rariny ve hoy aho ? manontany tena raha saro-piaro
Rariny angamba satria tsy tiako ho simba ilay voninkazo
Ka raha ho tanako / ilay anjara ekeko fa tokana an-tany.
Efa ianao no eo anilako feno fitiavana ny tany.
Mety ho lainga hoy ianao / anjaranao koa no mandalina .
F’izao aho aloha handeha hatory / hanofy anao indray aho rahalina .

Iny alina iny dia tsy ho hadino mandrakizay
Mampanontany tena ny tena hoe / rahoviana indray
Alina mamy an’izanyyy / ohatran’ny misy “chocolat”
Alina nitenenako hoe : tiako ny vadiko rangahy a
Raha iray ny fitiavako azy taloha dia niampy zato izany izao
Ka ho anao rahalahy mba niampy ve ny fitiavanao ny vadinao
Tiavo ny vady ho tokana / fa lova iray tsy mifindra
Hatramin’izay raha ratsy dingana / ankehitriny tsara famindra
Iny alina iny no hisaory fa manome hevitra be dia be
Ho an’ireo izay manam-pitiavana na kely na lehibe
Iny alina iny teny tokana hoentina hialan-tsiny
Fa nampitombo fitiavana marina / iny alina iny.  


Réf:: Iny alina iny aho nanofinofy anao’za
         Iny alina iny aho nahatsiarotsiaro anao’za
         Iny alina iny aho nanofinofy anao’za
         Iny alina iny aho nirediredy anao’za


SAMANTHA sy KAYAH
Sam - Kay / Nicolas  
©  MADLABEL 2002
--------