Vatofehizoro (Rambao)

(Nalaina tao amin'ny tononkira.serasera.org)
Malahelo isan’andro isan’andro
Mitomany mahatsiaro azy foana
Indrindra ange rehefa mody masoandro
Somambisamby eny antampon-kavoana

Ilay veloma niraisanay farany
Toa sento sisa manodidina
Nantsoiko mafy tamin’ny saiko ny anarany
Teny antseranam-piaramanidina

O antenaiko fa akaiky dia ho vita
Ny fianarana ataony any am-pita
Nefa na ho ela na ho haingana izany
Tsy mampaninona andrasako ihany
Zakaiko mora mba ho ahy samirery
Satria fitia tsy natao an-tery
Ny velirano izay efa najoro
Dia manamafy ilay vatofehizoro

Fahoriana mavesatra tokoa
Satria tsy am-bolana fa aman-taona
Izaho akory tsy hoe mamoy fo
Fa manantena tsy maintsy mbola hihaona

Eny iriko ho fitia diavolana
Andro mamiratra mandrakizay
Fiadanana izay lavitry ny olana
Handravaka ny tokantranonay

Miezaka mafy hitsinjo ny ao aoriana aloha
Fa raha tsy izany tsy misy lapa soa
Adidy maro mavesatra sy ngazana
Tsy hadino koa ny tanindrazana
N’inona n’inona onjan’ny tany
Tsy kivy akory fa andrasako eto ihany
Ny velirano izay efa najoro
Dia manamafy ilay vatofehizoro
--------
Rohy:
Hametraka hevitra
Midira aloha
Momba ny hira
Mpihira : Rambao
Vangy : 10372
Mpankafy : 2 Ankafizo
Nampiditra :
Daty : 19/12/2002 16:04
Tondrom-peo

Mbola tsisy nampiditra tondrom-peo

Hampiditra
© serasera.org 1999 - 2024 - page load 0.0232