Fo mifampitady (Lalie Andriamazava)

Masoandro mivaliaka ny masonao mijery
Mangalangalatra ahy
Tsy fantatro izay dikany, fa toa mieriery
Kanefa koa toa sahy

Odiako tsy jerena odiako hangarihina
Ezahiko adinoina
Fa miherika mankany ny masoko variana
Miandry ny hoantsoina

Dia mifamilafila teo toa ankizy miady
No fijery anay
Kanefa ange ny fonay dia mifampitady
Efa may dia may

Ka nony vetivety voatery nifandao
Ny masony sy ny ahy
Toa banga vetivety izao tontolo izao
Verivery fanahy
--------