Raozy Maina (Henri Ratsimbazafy)

Firifiry,
voatahiry
hitako isan’andro izao,

zava-maro
mifangaro
samy mampatsiahy anao,

nefa iray amin’ireny
mamiko tokoa
fa toa manana fiteny
mihatra ao am-po.

RAOZY KELY EFA MAINA
voatahiry ela tao
no manetsika ny saina
ahatsiaro anao,

RAOZY KELY EFA MAINA
vasoka, makiana koa
nefa manana ho lazaina
ka manoina fo.

RAOZY KELY MAINA SISA
indro eo mamohafoha,
mitantara, mitanisa
ny natao taloha.


Henri RATSIMBAZAFY
1971
--------