Rahoviana no hipaika ? (Andrianary Ratianarivo)

Rahoviana no hipaika
Itony andro nandrandraina ?
Fa ny foko, ny foko anie ka maika
Maika, te-hihira, hihira ny maraina.

O ry andro mba tongava
Hivimbino voninkazo
Fa miandry, miandry lalandava
Miandry sady te-hahazo.

Rahoviana no ho heno
Itony tsantam-pifaliana ?
Fa ny foko te-ho feno
Tsikitsikin'olon-tiana.

Izany foko manantena
Tsy hitsahatra hiahy
O ry andro volamena
Aza manalavitra ahy.
--------